Klukkan nálgast miðnætti í íbúð Auersbergerhjónanna. Húsráðendur hafa boðið menningarelítu Vínar til listræns kvöldverðar og von er á heiðursgestinum, leikara við hið þekkta Burgleikhús, hvað úr hverju. Í rökkvuðu skoti situr maður í vængjastól, fylgist með hégómlegri samkundunni og minnist gamallar vinkonu sem borin var til grafar fyrr um daginn. Hann á vart eftir að mæla orð frá vörum allt kvöldið en í huganum fer hann með hamslausa einræðu um tilgerð og tækifærismennsku gesta og gestgjafa, fólks sem hann hafði sagt skilið við tuttugu árum áður – en getur þó ekki almennilega slitið sig frá.
Skógarhögg: Geðshræring eftir Thomas Bernhard kom fyrst út árið 1984 og olli strax ólgu í menningarlífi Vínar, var raunar fjarlægð tímabundið úr verslunum vegna ásakana um svæsnar ærumeiðingar. Þetta var þó ekki í eina skiptið sem Bernhard reitti landsmenn sína til reiði, enda hafði hann einstakt lag á að afhjúpa austurríska þjóð og sögu hennar í verkum sínum. Skógarhögg er þar engin undantekning og ber höfundareinkennum hans skýrt vitni: miskunnarlausri gagnrýni, músíkölskum stíl, bölsýni og sótsvörtum húmor.
Hjálmar Sveinsson íslenskaði og ritaði eftirmála.