Fyrsta hefti ársins er unnið í samstarfi við aðstandendur Queer Situations bókmenntahátíðarinnar, þær Höllu Þórlaugu Óskarsdóttur og Evu Rún Snorradóttur. Hátíðin fór fram í fyrsta skipti í ágúst síðastliðnum og á stór hluti efnisins sem tengist þema heftisins – hinsegin bókmenntum – rætur að rekja til hátíðarinnar. Brugðið er ljósi á tvo af erlendu gestunum, Madame Nielsen og Maggie Nelson; Unnur Steina K. Karls rýnir í birtingarmyndir trans persóna í íslenskum bókmenntum; birt er Ljóðainnrás sem heppnir gestir veitingahúsa í Reykjavík heyrðu meðan á hátíðinni stóð, og Hinsegin bókmenntabarsvar sem lagt var fyrir gesti hátíðarinnar. Annað hinsegin efni er ótengt hátíðinni, svo sem ljóð Eileen Myles sem tók þátt í dagskránni Árljóðum í Iðnó á nýársdag, og svipmynd Dagnýjar Kristjánsdóttur af vinkonu sinni, Stellu Hauksdóttur.
Utan þemans er litið til ýmissa átta. Markús Þór Andrésson fjallar um nýafstaðinn Feneyjatvíæring í myndlist, Natasha S. segir frá fróðlegri heimsókn í bókabúðir í Moskvu og Linda Vilhjálmsdóttir opinberar uppruna tveggja smáatriða í ljóðum sínum, svo fátt eitt sé nefnt. Auk þess má finna í heftinu sögur og ljóð af fjölbreyttu tagi, meðal annars spánnýtt verðlaunaljóð Önnu Rósar Árnadóttur úr samkeppninni um Ljóðstaf Jóns úr Vör sem veittur var í 21. sinn í nýliðnum mánuði.